Спортпа туслă пулмалла

Хусканусем  тумалла

Спорт вăл пурнăç пулнине

Ялан асра тытмалла!

  Пĕтĕм Раççейри «Наци кросĕ» чупăва 2004 çултанпа йĕркелеççĕ. Хамăр çĕршыври чылай регионта иртекен ăмăртăва çулсерен пин-пин çын хутшăнать. 

  Спортпа тата физкультурăпа туслă пулмалла. Спорт сывлăха çирĕплетет: ăс-тăна йĕркене кĕртет, кăмăла çĕклет, ĕмĕре вăрăмлатать. Çакна Турхан шкулĕнче вĕренекенсем питĕ лайăх пĕлеççĕ.

   Шкул çумĕнчи стадионра чупăва хутшăнма кăмăл тăвакан шкул ачисем старта тăчĕç. Шкул директорĕ Валерий Осипов ачасемпе вĕрентекенсене уяв ячĕпе саламларĕ.

       Ăмăрту виçĕ тапхăрпа иртрĕ. Кроса  кĕçĕн класра вĕренекенсем пуçларĕç. Хĕр ачасем хушшинче  Ершова Кристинăпа  (1 класс)  Маркова Диана (4 класс) малти вырăнсене йышăнчĕç. Арçын ачасем  хушшинче вара  Фомин Глебпа (2 класс) Бузакин Виктор (4 класс) çĕнтерÿçĕсем пулчĕç. 5-7 –мĕш классем хушшинче Бузакина Анастасияпа Карлинов Александра никам та çитеймерĕ.  Ăмăртура 8-9 класра вĕренекенсем те лайăх çитĕнÿсем кăтартрĕç. Лябукова Валентинăпа Чемеров Алексей финиша чи малтан чупса çитрĕç. 10-11 класра вĕренекенсем хушшинче Вавилов Олегпа Бузакина Ирина хăйсен тантăшĕсенчен малтан  чупса тухрĕç.

       Çĕнтерÿçĕсене шкул директорĕ саламласа хисеп хучĕсем пачĕ.